O campo do Mouro de Guillade é un xacemento arqueolóxico que acolle máis dunha decena de mámoas. Un lugar máxico, no que os nosos antepasados enterraban aos seus mortos. O espazo, duns dous quilómetros cadrados, acolle 11 mámoas, algunhas con 25 metros de diámetro e 2 metros de alto. En xeral foron violadas, é dicir, escavadas na busca de posibles tesouros, como ouro ou xoias que se depositaban dentro da cámara funeraria xunto aos falecidos.
A cultura megalítica aínda conta con elementos destacables no noso Concello, mais esta concentración de mámoas é unha das máis relevantes.
A actividade estará guiada polo arqueólogo Rafael Gutiérrez, que nos dará, xusto antes do solpor, as indicacións precisas para descubrir este mundo.
Desde O Faiado consideramos preciso por en valor o noso patrimonio e actividades como estas axudan a coñecer o noso pasado, valoralo e, deste xeito, intentar que non se prexudique no futuro.
