Imos facer un enxame de contos de abellas e mouras e xente. E son contos fantásticos!

Público adulto | Galego

AVISO IMPORTANTE: rogamos aos asistentes non botar perfume porque podería atraer ás abellas.

Sobre Avelino González

É actor, contador, tradutor e director. Traballou en teatro, televisión, cine e bares. En compañías como Ollomoltranvía, en espectáculos como Commedia, en películas como Heroína ou Gallego, en series de televisión como Padre Casares, Cuéntame, Hopital Central… e o seu labor teatral foi recoñecido con varios Premios María Casares.

Cos contos xa percorreu Europa (Polonia, Alemaña, Suíza…) saltou o Atlántico (Cuba), e toda a península. Fixo dous espectáculos de contos para teatros. Un deles, Vento mareiro, foi o espectáculo máis representado en Galicia no 2005 e recibiu o Premio María Casares a Mellor Música Orixinal.

Avelino González pódese atopar en teatros ou bares, na gran pantalla e na pequena (a da tele, e tamén a do ordenador). Pode parecer moita cousa e moi distinta pero en realidade é a mesma cousa: contar ou axudar a contar as de outros en distintos formatos.

Como chegar á alvariza de Acevedo (ou de Ramón)

A alvariza atópase na parroquia de Zobra, no concello de Lalín. Unha vez en Lalín collemos a estrada PO-534 ata o cruce de Vilatuxe (14 km) e alí apartamos pola esquerda cara a Zobra, a uns nove quilómetros. Arrancando do cruce de Zobra para Acevedo e marchando cara A Trigueira, a un quilómetro e xusto antes de cruzar o río Zobra, na man dereita da carreteira e a uns vinte metros dela, atópase a coñecida como Alvariza de Acevedo.

Coord. xeográficas : latitude: 42º 33' 58'' N | lonxitude: 8º 12' 45'' W

Coordeadas UTM: datum ETRS89: H 29 // X 564.634,05 m / Y 4.712.947,66 m

Información extraída de BUXA.