Soprando a nosa buguina, comezaremos a viaxe polo mar. Visitaremos illas onde viven caracois, galiñas poñedoras e vacas. Regaremos a herba. Xogaremos coa marea que sobe e baixa. Cantaremos cancións sobre a lúa e faremos barcos de papel para continuar viaxando lonxe. Brincamos coa imaxinación recreando animais con obxectos, barcos e illas de papel, un mar de tea ao son da música e as palabras.

Bebés 0-3 anos | Galego

Sobre Marta Ortiz

Son catalá, de orixe andaluz e vivo e conto en Galicia dende o 2007. Así que tamén son galega de adopción e corazón. Vivín en varias cidades ata que cheguei a Santiago de Compostela. Alí foi onde descubrín os contos contados. En Santiago chovía tanto que un grupo de forasteiros empezamos a xuntarnos para contar historias e esquecer a choiva.

No 2007, xunto co músico e narrador oral Brais das Hortas, fundamos a compañía Tropa de Trapo e comezamos a contar contos con música polos institutos de Galicia. Tempo despois, tamén para público adulto, infantil e familiar. Dende 2017 comparto aventura como socia fundadora de Charlatana Cooperativa Galega de Artistas con outras tres compañeiras.

Conto soa e acompañada. Conto para todas as idades. Conto con obxectos, xogo co xesto, a rima e a música. O meu repertorio nace de contos tradicionais, de historias de vida, de recordos incompletos, onde realidade e ficción se entrelazan ata que non se sabe onde remata unha e comeza a outra.