EMON taldea bueltan da 4 urteko etenaldiaren ondoren. Talde gipuzkoarrak 2016ko azaroan Argentinan eman zuen kontzertuaren ostean iragarri zuen etenaldia.

Orain ordea, inoiz baino indartsuago datoz eta horren adierazle da pasa den otsailean Bergaran egindako Itzulera Kontzertu berezia. Zazpikotea sarrera guztiak agortuta itzuli zen taula gainera, jarraitzaileei Konfeti Kolore (2013) eta Sua (2014) diskoetako abesti esanguratsuenak eskainiz.

Taldearen izaera, besteak beste, reggae, cumbia, rumba, ska, rock eta popean oinarritzen diren kantu alai eta koloretsuek definitzen dute, kontzertu bakoitzean giro ezinhobea sortzen delarik.

Taldea urte luzez ibili da Euskal Herri osoan eta kanpoan kontzertuak ematen. Catalunya, Italia, Suitza, Ingalaterra eta Argentinan ere egin ditu birak, besteak beste.

Orain, taldekideak prest daude etapa berri bati ekiteko, hori dela eta “Aurkitu Zaitut” deituriko kantu berria kaleratu dute.

Ez galdu hurrengo zita Elgetako Kafe Antzokian!