2011n sortu zen McOnak taldea Lekeition, lagun artean musika egiteko asmoz. Ordutik lau disko plazaratu dituzte: “McEta” (2012), “Piraten matxinada” (2013), “Galarrena” (2015) eta “Gure Naufragioak” (2018). Folk-rock doinuekin laguntzen dituzte haien letra aldarrikatzaileak, eta musika herrikoia egiten dute, erritmo bizia jarriz. Urteetako ibilbidearen ostean sei lagunek osatzen dute taldea egun: Beñat (trikitixa eta akordeoia), Irati (biolina), Joseba (ahotsa eta gitarra akustikoa), Kemen (gitarra elektrikoa), Koldo (baxua) eta Maren (bateria). Hamargarren urteurrena dela eta, “Bitakora” izeneko diska berria plazaratuko dute udazkenean.