UBICACIÓN DO ESPECTÁCULO

Nesta ligazón tes a ubicación exacta do evento. Tamén atoparás un mapa ao final desta páxina.

Haberá un número limitado de cadeiras (50). O resto do aforo vai sentar na herba así que trae algo para o chan. Tamén haberá mantas en número limitado. Se queres, trae unha lanterna para o camiño entre o coche e o lugar do espectáculo.

'Lobadías'

Na Serra Segundeira, onde o oeste zamorano se fai galego, chaman “lobadía” ao lugar do lobo, e é o lobo naquel páramo de gando nómada, de vaqueiros, fuxidos e arrieiros, o señor de tódolos contos, e as súas presenzas as historias máis contadas.

Naquelas terras nas que Guti partiu o pan con pastores lendarios, con alimañeiros, rezadoras de responsos, xentes que nos camiños tantas veces atoparon á besta cara a cara, cos xuíces dos concellos de lobos, cos que buscaban as camadas e as paseaban, cos que levantaron os curros, cortellos, chorcos, as trampas para o lobo.

Lobadías son os contos, os romances, os saberes e as palabras secretas coas que Guti rende homenaxe a todas esas xentes que lle contaron sobre o lobo, do mesmo lobo que lle ensinou os dentes, ao que escoitou ouvear nas noites de outono e co que se cruzou tantas veces nos camiños.

Público adulto | Castelán

Sobre José Luis Gutiérrez

‘Guti’ é gaiteiro, cantador, bailador e sobre todo contador de historias. Realizou un inmenso labor de compilación etnográfica en longos seráns de cociña e serano, en vilas de Zamora, León e Salamanca. O seu traballo céntrase no uso de materiais recollidos directamente de narradores tradicionais, na súa maior parte anciás e anciáns do mundo rural. Traballou principalmente na contorna rural intentando dalgunha maneira restablecer a cadea de comunicación-transmisión da cultura oral rota pola condena dos anciáns ao silencio nunha sociedade dominada polo que se repite dende o televisor.

É habitual dos festivais de narración e colaborador en traballos discográficos de grupos como Mayalde, Bajo Duero ou La Ronda de Motilleja. Dirixiu unha morea de espectáculos sobre a tradición, publicou artigos relacionados coa etnografía en revistas como 'El Filandar' e colaborou en moitas publicacións especializadas .Polo seu espectáculo 'A pelo' recibiu no 2015 o Premio de Interpretación Masculina na XII Edición dos Premios Moretti de Teatro.